I bi neutral Mann, i tue nid schtriiite
I schlo mi nid uf eini Siite
Mir hei Bärge, mir hei Chüe u di beschti Schoggi wiit u breit,
Vo Brüssel löh mir üs nid säge, wo’s politisch düre geit.
Sanktione hie, Sanktione dert moralisch tönt’s jo guet,
doch wemä eire Site hüuft, simer nüm neutral im Bluet.
Wes dussä brönnt de chömier nid im Alpäbunker hocke,
Und vo dr EU löhmer üs nid inä Wäutchrieg locke.
Es bruucht nid immer Panzer, Drohne oder Gschrei,
Mi söt doch zäme rede und Fride ha dehei.
I bi neutral Mann, i tue nid schtritte
I schlo mi nid uf eini Siite
Aui Vöuker chöi im Fride läbe
Blibet neutral und tüet zäme häbe!
Si mer no neutral, ömu ufäm Papiir?
Und wenn Brüssel rüeft, wäm fouge mir?
Wär aui Brügge zämebombt, dä duet nümm eini boue
Wenn niemer meh tuet zäme rede, wäm chasch de no vertroue?
D’Neutralität si ghört zur Schwiiz sit 1515.
Ändi Septämber bruucht si mii und i tue sä ungerstützä!
Vo Washington bis Moskau, vo Brüssel bis Berlin,
we mir üs ufäne Site schlöh, isch d’Neutralität dahin
Wenn d’Türe zue si, d’Händy stumm und jede nume schiesst,
brucht’s eine, wo vermittle cha, wo no s’Vertroue gniesst.
Vielläch isch neutral sii unbequem und sicher nid modärn,
Mi wott nid gäge d’Strömig schwümme u ersch rächt nid in Bärn.
Bevor mir d’Neutralität verschänke, sötte mir üs bsinnä:
Chönnt me vilech zäme rede und so ä Fride gwinnä?
Dr Bundesrat cha rede, d’Parteie striite bis i d’Nacht,
D’Expärte chöi erkläre, was dr richtig Kurs usmacht.
Doch wenn’s Abstimmigskuvert uf em Chuchitischli ligt,
denn weiss jede Schwiizer: Jetzt isch es üsi Zyt.
Nid Washington, nid Moskau, nid Brüssel tuet bestimmä
was mir uf dä Zödu schriibe, i cha mi säuber bsinnä.
Mir müesse nid im Bunker hocke, wüu d’Wäut i Flamme steit,
D’Neutralität chas scho no richte, d’Diplomatie het nid verseit.
I bi neutral Mann, i tue nid schtritte
I schlo mi nid uf eini Siite
Aui Vöuker söue im Fride läbe
Blibet neutral und tüet zäme häbe!
Mir si neutral u zeige Farb: rotwiis äs isch bekannt.
Wenn Brüssel rüeft, luegemir wäg, s’isch numä ä Vagant.
Wenn angeri wei Brügge bombe mir düe no eini bouä
Ir Schwiiz chame no cho rede, üs darfme no vertrouä
D’Neutralität si ghört zur Schwiiz, sit 1515.
Mir gäh si nid so eifach ab, i tue sä ungerstützä!